Jańalıqlar

Ózbekstan mámleketlik konservatoriyasınıń Nókis filialı shólkemlestirilmekte. Oǵan neshe student qabıllanıwı jobalastırılǵan?


2021-2022-oqıw jılınan baslap Ózbekstan mámleketlik konservatoriyasınıń Nókis filialı óz jumısların baslawı jobalastırılǵan.

ÓzR Prezidentiniń «2021-2022-oqıw jılında Ózbekstan Respublikasınıń joqarı oqıw orınlarına oqıwǵa qabıllawdıń mámleketlik buyırtpası parametrleri haqqında»ǵı qararınıń joybarına muwapıq, filialǵa 2021-2022-oqıw jılı ushın ulıwma 72 student, sonnan 42 si mámleketlik grant, al 30 ı tólemli kontrakt tiykarında qabıllanıwı belgilengen.

Atap aytqanda, professional bilimlendiriw (5 grant, 5 kontrakt), kórkem ónertanıw (5 grant, 5 kontrakt), dirijyorlıq (4 grant, 4 kontrakt), vokal óneri (3 grant, 2 kontrakt), saz ásbapları atqarıwshılıǵı (25 grant, 14 kontrakt) baǵdarları boyınsha studentler qabıllanıwı jobalastırılǵan.

Esletip ótemiz, Ózbekstan Respublikası Prezidenti Sh.M.Mirziyoevtiń 2020-jıl 2-oktyabr kúni Qaraqalpaqstan Respublikasına saparı dawamında jáne Qaraqalpaqstan Respublikası Joqarǵı Keńesiniń gezeksiz segizinshi sessiyasında berilgen tapsırmalar hám keńeytilgen tárizde ótkerilgen májilis protokolı qararına muwapıq, Ózbekstan mámleketlik konservatoriyasınıń Nókis filialın shólkemlestiriw boyınsha tapsırmalar berilgen edi.

 

Islam Matekov,

Qaraqalpaqstan xabar agentliginiń sholıwshısı.