«Жаслар форумы»: Қараөзекте 6 жасқа жер ажыратылды, 3 жасқа мотоцикл, және бир жасқа оңлаў жумыслары ушын аппарат тапсырылды


Усы жылдың 1-март сәнесинен баслап Қарақалпақстан Республикасының Елликқала районында «Жаслар форумы»на старт берилген еди. Форум барлық районлар кесиминде арнаўлы реже тийкарында даўам етпекте.

Күни кеше, 29-март күни «Жаслар форумы» Қараөзек районында даўам етти.

Қараөзекли жасларға жоқары кейпият бағышлаған форум «Саламатлық ушын 5000 қәдем» жаслар марафоны менен басланды. Жойбарға район Басланғыш шөлкеминиң жетекшилери, сәрдарлар ҳәм жәмлеспеген жаслар, жәми 280нен аслам жаслар бир сүрен астында бирлести.

Форум шеңберинде ҳаял-қызлардың исбилерменликке болған қызығыўшылығын асырыў мақсетинде район сәрдарлары ҳәм улыўма билим бериў мектеби питкериўши класс оқыўшылары қатнасында Бәнтликке көмеклесиў орайы тәрепинен шөлкемлестирилген Гөззалық ҳәм тигиўшилик курсларына саяхаты , сондай-ақ, А.Досназаров аўыл пуқаралар жыйынында жайласқан “PANAEVFARMS”  жуўапкершилиги шекленген жәмийетине Агроэкономика техникумы Ветеренария топары оқыўшылары ушын саяхат шөлкемлестирилди.

Саяхат даўамында жаслар өзлерин қызықтырған сораўларына жуўаплар алды ҳәм  олардын бири Өмирбаев Азамат  шарўашылыққа деген қызығыўшылығы жоқары болганлығы себеп келешекте жасап атырған аймаағында шарўашылық комплесин ашып, өз бизнесин жолға қойыў нийетинде екенлигин айтты.

Бундай саяхатлар жаслардың бизнес көнликпелерин асырыўда айрықша әҳмийетке ийе.

Район орайындағы «Қарақум Абдулла» ЖШЖниң киши футбол майданшасында 2003-2004-жыллары туўылған ул балалар арасында жарыс өткерилди. Онда жәми 18 команда белсендилик көрсетти. Жарыс жуўмағында 2-санлы қәнигелестирилген мәмлекетлик билим бериў мектеби оқыўшылары сыйлы I-орынды, 1-санлы улыўма билим бериў мектеби сыйлы II-орынды, кәсип-өнер мектеби оқыўшылары сыйлы III-орынды ийелеп шөлкемлестириўшилер тәрепинен естелик саўғалары ҳәм дәрежели диплом менен сыйлықланды.

 

 

Қараөзектеги “Жаслар дәптери”ндеги 3 жасқа жеңиллетилген кредит тийкарында өзин-өзи бәнт етиўи ушын район ҳәкими У.Утамбетов тәрепинен мотоцикллер, сондай-ақ 1 жасқа оңлаў жумыслары ушын аппарат тапсырылды.

 

Жаслар форумы даўамында “Қуўнақлар ҳәм зийреклер” таңлаўы болып өтти. Онда жәми 6 команда қатнасып, 28-санлы улыўма билим бериў мектебиниң «Позитив» командасы сыйлы I-орынды,
1-санлы улыўма билим бериў мектеби сыйлы II-орынды, Кәсип-өнер мектебиниң «Қәрекеңниң жигитлери» командасы сыйлы III-орынды ийелеп, шөлкемлестириўшилер тәрепинен қымбат баҳалы саўғалар ҳәм дәрежели диплом менен сыйлықланды.

Қараөзек районының “Мәденият”АПЖ аймағында 6 жумыссыз жасқа 6 гектар жер майданы ажыратып берилди. Бул жасларға дийхан, фермерлерден тәжирийбе алып өз жумысларын жолға қойыўлары, субсидиялардан пайдаланыўлары ушын имканият жаратылды.

Мағлыўмат ушын: Районда жыл басынан жәми 735 жасқа 738,1 гектар жер майданлары ажыратылып берилди.