Jańalıqlar

Ámiwdárya rayonında Ministrler Keńesi Baslıǵı hám ministrlerdiń jaslar menen ushırasıwı bolıp ótti


Búgingi kúnde jaslarǵa jaratılıp atırǵan imkaniyatlar menen tereńirek tanıstırıw, olardıń qábiletlerin júzege shıǵarıw, mashqalaların úyreniw hám turmısta múnásip orın iyelewine kómeklesiw maqsetinde respublikamız boylap jaslar menen ushırasıwlar ótkerilmekte.
29-mart yaǵnıy búgin Ámiwdárya rayonında Tórtkúl, Ellikqala, Ámiwdárya Xojeli, Taqıyatas rayonları hám Nókis qalası jasları menen ashıq sáwbet kórinisindegi ushırasıw bolıp ótti.
Oǵan Qaraqalpaqstan Respublikası Ministrler Keńesi Baslıǵı Q.Sariev, Qaraqalpaqstan Respublikası basqarması baslıǵı, senator A.Daniyarov Ózbekstan Respublikası Awıl xojalıǵı ministriniń orınbasarı A.Twraev, Ózbekstan Respublikası Oraylıq bank baslıǵınıń orınbasarı A.Kamalov, Ózbekstan Mámleketlik statistika komiteti baslıǵı orınbasarı M.Ziyadullaev, Ózbekstan jaslar isleri agentligi hám bir qatar ministrlikler menen juwapker shólkemlerden wákiller qatnastı.


Ushırasıwda Ámiwdárya rayonınan Shamuratova Mexrigúl shańaraqlıq balalar baqshasın shólkemlestiriw boyınsha kredit sorap múrájat etti. Bunday unamlı baslama menen shıqqan Mexrigúliń múrájatı Ózbekstan Respublikası Oraylıq bank baslıǵınıń orınbasarı A.Kamalov tárepinen qollap-quwatlanıp kredit ajıratıw boyınsha tapsırma berildi. Sonday-aq, Bazarbaev Soxitjon ózin-ózi bánt etiw ushın ıssıxana qurıwda ámeliy járdem sorap múrájat etti. Ministrler Keńesi Baslıǵı Q.Sariev bul múrájattı jeke óziniń qadaǵalawına alıp rayon hákimligine tapsırma berildi.


Ashıq sáwbette jaslardıń mashqalaları, qızıǵıwshılıqları menen usınısları tıńlandı. Bildirilgen mashqala hám usınıslar mánzilli úyrenildi hám unamlı sheshim taptırıw boyınsha juwapkerlerge tiyisligi boyınsha tapsırmalar berildi.

 

 

QR Ministrler Keńesiniń Málimleme xızmeti