Kúni keshe, Nókis qalasındaǵı Jaslar orayında Ózbekstan Respublikası Jaslar isleri agentligi direktorı A.Sadullayev qatnasında «Basshı hám jas isbilermenler» ushırasıwı bolıp ótti.

Ushırasıwda Agentlik direktorı qaraqalpaqstanlı isbilermen jaslardıń usınıs hám baslamaları menen tanıstı.

Atap aytqanda, jas isbilermenler arasında Indira Jumabayeva óziniń milliy hám zamanagóy kiyimleri uyǵunlıǵı haqqındaǵı jańa baslaması, Nasiba Pirlenovanıń qızlardı kásip-ónerge úyretiwge baǵdarlaw, Bayqaraeva Gúljaynardıń «Zergerlik mektebi»n ashıw haqqındaǵı baslamaları Agentlik direktorı tárepinen qollap quwatlandı.

Ilaj dawamında Agentlik direktorınıń ilim-bilim iyelew jolındaǵı qıyınshılıqları, shańaraqlıq mashqalalarına qaramastan alǵa qaray umtılısları haqqında sóz etilgen waqıyaları jaslarda ózgeshe sezim oyata aldı.

Qaraqalpaqstanlı jas isbilermenler tárepinen 50 ge jaqın usınıs hám baslamalar sóz etildi. Ayırımları sol waqıttıń ózinde sheshim tapqan bolsa, bildirilgen usınıslar boyınsha arnawlı baǵdarlama islep shıǵılıwı hám mánzilli reje tiykarında jas isbilermenlerge ámeliy járdemler korsetiliwi belgilep alındı.

Sonday-aq, Agentlik direktorı jas isbilermenler ushırasıwınan soń mashqalası bar jaslar menen de ushırasıp, múrájatların qabılladı.