Usı jıldıń 9-16-may kúnleri aralıǵında «Bozataw FEST — Jaslar hawazı» tańlawınıń respublikalıq final basqıshı úshinshi ret Qaraqalpaqstan Respublikasında bolıp ótti. Sonday-aq, búgin, 16-may kúni ilajdıń saltanatlı jabılıw máresimi Bozataw rayonında ótkerilmekte.

Festivaldıń jabılıw máresiminde Qaraqalpaqstan Respublikası Joqarǵı Keńesi Baslıǵı Amanbay Orınbaev hám Ózbekstan Jaslar isleri agentligi direktorı Alisher Sadullaevlar sózge shıǵıp, keń kólemde ótkerilgen tańlaw boyınsha áhmiyetli pikirlerdi bildirdi.

Jámi 248 mıń jas qatnasıw tilegin bildirgen tańlaw juwmaǵına bola, Qaraqalpaqstan Respublikasınan tórt qatnasıwshı sıylı 1-orındı jeńip alıwǵa miyasar boldı hám olarǵa pul vaucherleri tapsırıldı.

Olar:

Estrada baǵdarı boyınsha 23-30 jas kategoriyasında — Timur Nuratdinov;

Baqsıshılıq baǵdarı boyınsha 23-30 jas kategoriyasında — Quwanısh Seytimbetov;

Opera baǵdarı boyınsha 10-15 jas kategoriyasında — Saydmurat Taganov;

Baqsıshılıq baǵdarı boyınsha 10-15 jas kategoriyasında — Umida Ayapova.

Bunnan tısqarı, estrada baǵdarı boyınsha 15-22 jas kategoriyasında qatnasqan Orazbiyke Jienbaeva sıylı 2-orındı, baqsıshılıq baǵdarı boyınsha 15-22 jas kategoriyasında qatnasqan boyınsha Zulxumar Eliwbaeva, estrada baǵdarı boyınsha 10-15 jas kategoriyasında qatnasqan Ásemay Urakova hám opera baǵdarı boyınsha 15-22 jas kategoriyasında qatnasqan Sárbinaz Kárimbaevalar sıylı 3-orındı iyelewge miyasar boldı.

Maǵlıwmat ornında atap ótiw orınlı, jeńimpaz bolǵan talantlı jaslar — sıylı 1-orın iyeleri 50 million sum, sıylı 2-orın iyeleri 30 million sum, sıylı 3-orın iyeleri 20 million sum hám respublika basqıshında qatnasqan barlıq qatnasıwshılar 10 million sumnan pul sıylıǵı menen sıylıqlanadı.