Ózbekstandaǵı barlıq mekteplerde «Sońǵı qońıraw» ilajları 25-may kúni saat 08:00 den 08:45 ke shekemgi (45 minut dawamında) waqıt aralıǵında bolıp ótedi. Bul boyınsha Ózbekstan Respublikası Xalıq bilimlendiriw ministrligi usınıs islep shıqtı.

Usınıs etilgen scenariyǵa tiykar, ilaj dawamında 2021-2022-oqıw jılında úlgili bahalarǵa oqıp, eń joqarı reyting kórsetkishlerine iye bolǵan uqıplı pitkeriwshiler xoshametlenip, sıylıqlanadı.

Sonday-aq, «Sońǵı qońıraw» keshesi mektep háwlisindegi baǵda yamasa salqın ashıq maydanlarda ótkeriliwi jáne ol jerge biytanıs adamlardıń kirgizilmewi kerek ekeni atap ótilgen.

Mekteplerdiń «Baqlaw keńesi» aǵzaları joqarıda keltirip ótilgen usınıslarǵa ámel etiliwin qadaǵalap turadı.

«Ulıwma orta bilim beriw mákemeleriniń basshılarına hám muǵallimlerine pitkeriwshiler tárepinen túrli qımbat bahalı sawǵalar usınıw, qosımsha túrli saltanatlı ilajlardı (xojalıqlar, restoran, banket yamasa basqa jerlerde máresimler) ótkeriw, sonday-aq, jeńil avtomashinalarda aylanıwdı shólkemlestiriwdiń aldın alıwǵa ayrıqsha itibar qaratıw soraladı», – dep jazılǵan ministrlik xabarında.

Bekbergen Adilbaev, Makan.uz