Usı jıldıń 10-14-may kúnleri aralıǵında «Bozataw FEST — 2022» jaslar hawazı tańlawınıń respublikalıq final basqıshı ekinshi ret Qaraqalpaqstan Respublikasında bolıp ótti. Sonday-aq, keshe, 15-may kúni ilajdıń saltanatlı jabılıw máresimi Bozataw rayonında ótkerildi.

Festivaldıń jabılıw máresiminde Qaraqalpaqstan Respublikası Joqarǵı Keńesi Baslıǵı Murat Kamalov, Ózbekstan Jaslar isleri agentligi direktorı Alisher Sadullaev hám agentliktiń Qaraqalpaqstan Respublikası basqarması baslıǵı Ikram Abdikalikovlar sóz sóylep, keń kólemde ótkerilgen tańlaw boyınsha áhmiyetli pikirlerdi atap ótti.

Jámi 238 mıń jas qatnasıw qálewin bildirgen tańlaw juwmaǵına bola, Qaraqalpaqstan Respublikasınan tórt qatnasıwshı sıylı 1-orındı jeńip alıwǵa miyasar boldı hám olarǵa pul vaucherleri tapsırıldı.

Olar:

Еstrada baǵdarınıń 10-15 jas kategoriyası boyınsha — Zarima Maqsudova;

Еstrada baǵdarınıń 16-22 jas kategoriyası boyınsha — Alımbay Kárimbaev;

Baqsıshılıq baǵdarınıń 10-15 jas kategoriyası boyınsha — Áshirbek Qozıbaev;

Baqsıshılıq baǵdarınıń 16-22 jas kategoriyası boyınsha — Gúlayım Óteshovalar esaplanadı.

Sonday-aq, baqsıshılıq baǵdarınıń 23-30 jas kategoriyası boyınsha Azamat Elmuratov sıylı 3-orındı, opera baǵdarınıń 10-15 jas kategoriyası boyınsha Baxıtbek Qalıbaev sıylı 2-orındı iyelep jeńiske eristi.

Maǵlıwmat ushın atap ótiw orınlı, jeńimpaz bolǵan talantlı jaslar: 1-orın 50 million sum, 2-orın 30 million sum, 3-orın 20 million sum hám respublika basqıshına shıqqan barlıq qatnasıwshılar 10 million sumnan pul sıylıǵı menen sıylıqlandı.

Bekbergen Adilbaev, reportyor