Qaraqalpaqstan Respublikasında jámi 12 381,5 km avtomobil jolları bar. Sonnan 4 254 km ulıwma paydalanıwdaǵı avtomobil jolları Qaraqalpaqstan Respublikası Avtomobil jolları bas basqarması balansında, 8 127,5 km ishki xojalıq jolları, qalalar hám awıllıq jasaw punktleri kósheleri jergilikli hákimiyatlar balansında esaplanadı.

2007-jıl 2-oktyabrde «Avtomobil jolları haqqında»ǵı Ózbekstan Respublikası Nızamı qabıl etilgen bolıp, onda Ózbekstan Respublikası, sonıń ishinde Qaraqalpaqstan Respublikası aymaǵındaǵı avtomobil jolları, olardıń ekspluataciya jumıslarınıń alıp barılıw tártibi hám basqa da máseleler sóz etilgen.

Usı nızamnıń 10-statyasında «Qalalar hám basqa xalıq jasaw punktleriniń kósheleri qalalar, qala posyolkaları, awıllar sheńberinde boladı, usı kóshelerdiń Ózbekstan Respublikasınıń ulıwma paydalanıwdaǵı avtomobil jolları dizimine belgilengen tártipte kirgizilgen uchastkaları buǵan kirmeydi.

Qalalar hám basqa xalıq jasaw punktleriniń kósheleri mámleket múlki bolıp, jergilikli mámleketlik hákimiyat organları ıqtıyarında boladı.»-dep kórsetilgen.

Nızamnan kelip shıǵıp, ishki xojalıq jolları jergilikli hákimiyat organları balansında esaplanadı.

Bunnan tısqarı, ishki xojalıq jollarınıń ekspluataciya jumısları jergilikli Abadanlastırıw basqarmalarına júkletilgen.

Ishki xojalıq jolların ońlaw, asfalt jatqarıw, ЩPS tósew hám basqa ońlaw túrlerin alıp barıw ushın mámleketlik baǵdarlamalarǵa tiykar tiyisli tártipte tenderde oynaladı.

Kesip alıp islewshi jollardan paydalanıw unitar kárxanaları, jeke menshik kárxanalar tárepinen bul jumıslar orınlanıwı múmkin.

Qaraqalpaqstan Respublikası Avtomobil jolları bas basqarması málimleme xızmeti