«Doslıq» MPJdaǵı Nawrız bayramı haqıyqıy xalıq toylarına ulastı

Búgingi kúnde turizm máhállesine aylanǵan Moynaq rayonı «Doslıq» mákan puqaralar jıyını aymaǵı turǵınları joqarı keypiyat hám ózgeshe shadlıqlar menen Nawrız saltanatların bayramladı.

Saltanatta rayonımız xalqınıń ózine tán úrp-ádetleriniń biri «oramal salıw» bázimi bolıp ótti. Ilaj awılǵa kelinshek bolıp túsip, oramalı salınbaǵan úsh qız kelinshektiń qatnasında ótiwi menen ayırıqsha boldı.  Jası úlken ata-ájeler esigine iyilip, sálem salǵan kelinsheklerdiń betin ashıp, olarǵa aq pátiyasın berdi.

Jáne bir quwanıshlardıń biri táy-táy basıp endi qádem taslap kiyatırǵan Almira Qoshqarbaevanıń jaqsı tilekler menen tusawı kesildi.

Bayram ilajında basqa da oyın-zawıqlar shólkemlestirildi. Aymaqta jasawshı er azamatlar sporttıń gúres túri boyınsha kúshin sıńnan ótkerdi. Al, qızlar bolsa átkónshekte ushtı. Sonıń menen birge, jas analarǵa besiktiń jasalıwı kórsetildi. Súmelek pisirilip, dástúrxanǵa bayram taǵamları tartıldı. Arqan tartısıw, qoraz dúgistiriw oyınları bolıp ótti. Tuwısqan qazaq milletiniń wákilleri jerleslerimiz dombara menen ayaq oyınlar atqardı.

#Qazaqdarya_APJ

«Qazaqdarya» APJ aymaǵında «Nawrız tajın kiyip báhár kelip tur» atamasında bayram saltanatı 15-sanlı mektepte shólkemleskenlik penen ótkerildi.

Awıldıń nuranıylerı, turǵınları hám hayal-qızlar menen kóterińki keypiyatta ótkerilip, bayramda qaraqalpaq hám qazaq xalqınıń milliy dásturleri, taǵamlar kórgizbeleri hám sport oyınları ótkerildi.