Hár bir insan ushın Ana Watanın qorǵaw múqaddes wazıypa esaplanadı. Mine búgin, Qaraqalpaqstan Respublikası boyınsha Milliy gvardiya basqarmasında bir jıl dawamında múddetli áskeriy xızmetti ótegen jaslarǵa saltanatlı túrde usınısnamalardı hám minnetdarshılıq xatlardı tapsırıw máresimi bolıp ótti.

Ilájǵa Qaraqalpaqstan Respublikası boyınsha Milliy gvardiya basqarması baslıǵı polkovnik M.Yusupov, Qaraqalpaqstan Respublikası Ruwxıylıq hám aǵartıwshılıq orayı baslıǵı T.Atamuratov, Jaslar isler agentligi Qaraqalpaqstan Respublikası basqarması, Jaslar awqamı Qarakalpaqstan Respublikası Keńesi baslıǵı M.Kamalov hám Milliy gvardiya áskeriy xızmetkerleri hám keń jámiyetshilik wákilleri qatnastı.
Saltanatlı ilájda Qaraqalpaqstan Respublikası boyınsha Milliy gvardiya basqarması baslıǵı polkovnik M.Yusupov sózge shıǵıp, mámleketimizde ámelge asırılıp atırǵan reformalar haqqında aytıp, bir jıl dawamında komandirler hám baslıqlar tárepinen úyretilgen bilimlerdi tereń meńgergenligi ushın múddetli áskeriy xızmetkerler hám olardıń ata-analarına minnetdarshılıǵın bildirdi.
Onnan soń, Qaraqalpaqstan Respublikası Ruwxıylıq hám aǵartıwshılıq orayı baslıǵı T.Atamuratov búgingi kúnde elimizde jaslarǵa jaratılıp atırǵan imkaniyatlar haqqında aytıp, usı imkaniyatlardan jaslardı únemli paydalanıwǵa shaqırıp qaldı.

Jıllı tileklerden soń, Qaraqalpaqstan Respublikası boyınsha Milliy gvardiya basqarması baslıǵı polkovnik M.Yusupov hám miymanlar tárepinen 17 múddetli áskeriy xızmetkerlerge Joqarı oqıw orınlarına oqıwǵa kiriwde jeńilikler beriwshi usınısnamalar tapsırıldı.
Bunnan soń, áskeriy bólim komandiri podpolkovnik X.Umarov tarepinen áskeriy xızmet dawamında óziniń úlgili minez-xulqı menen teńleslerine órnek bolǵan áskerlerge minnetdarshılıq xatları tapsırıldı.
Bayram múnásibeti menen, Milliy gvardiya áskeriy xızmetkerleri saltanatlı túrde sap tarttı.
Kúnniń ekinshi yarımında bolsa, «Nókis Temir jol vokzalı»nda múddetli áskeriy xızmetkerlerge Qaraqalpaqstan Respublikası boyınsha Milliy gvardiya basqarması áskeriy bólim komandirleri tárepinen jáne bir márte olardıń ata-analarına minnetdarshılıq bildirilip, aldaǵı jumıslarında tasqın tabıslar tiledi.